ਜ਼ਹਿਰੀ ਪੌਣ.../ ਗ਼ਜ਼ਲ.../ ਜਗਵਿੰਦਰ ਜੋਧਾ

ਜ਼ਹਿਰੀ ਪੌਣ.../ ਗ਼ਜ਼ਲ.../ ਜਗਵਿੰਦਰ ਜੋਧਾ

ਝੱਲ ਨਾ ਹੋਵੇ ਬਿਰਖਾਂ ਤੋਂ ਸਾਵੇ ਪੱਤਿਆਂ ਦਾ ਭਾਰ
ਜ਼ਹਿਰੀ ਪੌਣ ਤੁਰੀ ਫਿਰਦੀ ਹੈ ਵਾਦੀ ਵਿਚ ਇਸ ਵਾਰ

ਮਨ ਦੀ ਪੀੜ ਦਾ ਤੋੜ ਉਨ੍ਹਾਂ ਨੂੰ ਮਿਲਿਆ ਕਿੰਨਾ ਖ਼ੂਬ
ਇੱਕੋ ਝਟਕੇ ਵਿਚ ਲਾਹ ਦਿੱਤੇ ਨੇ ਤਨ ਦੇ ਲੰਗਾਰ

ਹਰ ਘਰ ਦੀ ਖਿੜਕੀ ਚੋਂ ਝਾਕੇ ਕੁਝ ਅੱਖਾਂ ਦਾ ਖੌਫ
ਮੁੱਠੀ ਵਿਚ ਦਿਲ ਆ ਜਾਵੇ ਸੁਣਕੇ ਹਲਕੀ ਖੜਕਾਰ

ਜੋ ਵੀ ਆਪਣੇ ਹੱਕ ਮੰਗਣ ਲਈ ਭਰਦਾ ਉੱਚੀ ਸਾਹ
ਉਸਦੀ ਹਿੱਕ ਤੇ ਤਖਤਾ ਡਾਹ ਲੈਂਦੈ ਦਿੱਲੀ ਦਰਬਾਰ

ਰਾਮ ਵਿਲਾਸ, ਸ਼ਫੀਕ ਮੁਹੰਮਦ ਤੇ ਕੇਸਰ ਸਿੰਘ ਦੀ ਥਾਂ
ਨਾਮ ਉਨ੍ਹਾਂ ਦੇ ਹੋਏ ਬੋਦੀ, ਟੋਪੀ ਤੇ ਦਸਤਾਰ

ਇੱਕੋ ਅੱਖ 'ਨਾ ਵੇਖਣ ਦੀ ਥਾਂ ਹਾਕਮ ਕਰਨਾ ਚਾਹੇ
ਇੱਕੋ ਖਾਣਾ,ਇੱਕੋ ਬਾਣਾ, ਇੱਕੋ ਸਭਿਆਚਾਰ

ਅੱਧਾ ਜਿਸਮ ਪੰਜਾਬ ਹੈ ਮੇਰਾ, ਅੱਧਾ ਹੈ ਕਸ਼ਮੀਰ
ਸ਼ਾਲਾ ਵੱਖ ਨਾ ਹੋਣ ਸਵਾਮੀ,ਆਜ਼ਮ ਤੇ ਇਜ਼ਹਾਰ*

ਡੂੰਘੀ ਖ਼ਮੋਸ਼ੀ ਵਿਚ ਡੁੱਬੀ ਲਗਦੀ ਹੈ ਡਲ ਝੀਲ
ਸੁੰਨੇ-ਸੁੰਨੇ ਦਿਸਣ ਸ਼ਿਕਾਰੇ,ਗੁੰਮ-ਸੁੰਮ ਹੈ ਪਤਵਾਰ

ਫੌਜੀ ਬੂਟਾਂ ਦੀ ਆਹਟ ਜਾਂ ਫਿਰ ਗੋਲੀ ਦੀ ਚੀਕ
ਦੱਸਦੀ ਹੈ ਕਿ ਸਾਡੀ ਚਿੰਤਾ ਕਰਦੀ ਹੈ ਸਰਕਾਰ

ਸਾਡੇ ਨਾਲ ਜੁੜਨ ਲਈ ਸ਼ੁਕਰੀਆ ! ਤੁਹਾਡੇ ਵਿਚਾਰਾਂ ਦੀ ਉਡੀਕ ਰਹੇਗੀ I ਤੁਸੀਂ ਸਾਡੇ ਨਾਲ ਫੇਸਬੁਕ ਤੇ ਵੀ ਜੁੜ ਸਕਦੇ ਹੋ https://www.facebook.com/shivbatalvi