ਅੱਜ ਅਸੀਂ ਤੇਰੇ ਸ਼ਹਿਰ ਆਏ ਹਾਂ~ਸ਼ਿਵ ਬਟਾਲਵੀ

ਅੱਜ ਅਸੀਂ ਤੇਰੇ ਸ਼ਹਿਰ ਆਏ ਹਾਂ

ਅੱਜ ਅਸੀਂ
ਤੇਰੇ ਸ਼ਹਿਰ ਆਏ ਹਾਂ
ਤੇਰਾ ਸ਼ਹਿਰ, ਜਿਉਂ ਖੇਤ ਪੋਹਲੀ ਦਾ
ਜਿਸ ਦੇ ਸਿਰ ਤੋਂ ਪੁੰਨਿਆਂ ਦਾ ਚੰਨ
ਸਿੰਮਲ-ਫੁੱਲ ਦੀ ਫੰਭੀ ਵਾਕਣ
ਉਡਦਾ ਟੁਰਿਆ ਜਾਏ !
ਇਹ ਸੜਕਾਂ ਤੇ ਸੁੱਤੇ ਸਾਏ
ਵਿੱਚ ਵਿਚੱਚ ਚਿਤਕਬਰਾ ਜਿਹਾ ਚਾਨਣ
ਜੀਕਣ ਹੋਵੇ ਚੌਂਕ ਪੂਰਿਆ

ਧਰਤੀ ਸੈਂਤ ਨਹਾ ਕੇ ਬੈਠੀ
ਚੰਨ ਦਾ ਚੌਂਕ ਗੁੰਦਾ ਕੇ ਜੀਕਣ
ਹੋਵਣ ਨਾਲ ਵਧਾਏ ?
ਅਜ ਰੁੱਤਾਂ ਨੇ ਵੱਟਣਾ ਮਲਿਆ
ਚਿੱਟਾ ਚੰਨ ਵਿਆਹਿਆ ਚਲਿਆ
ਰੁੱਖਾਂ ਦੇ ਗਲ ਲਗ ਲਗ ਪੌਣਾਂ
ਈਕਰ ਸ਼ਹਿਰ ਤੇਰੇ 'ਚੋਂ ਲੰਘਣ
ਜੀਕਣ ਤੇਰੇ ਧਰਮੀ ਬਾਬਲ
ਤੇਰੇ ਗੌਣ ਬਿਠਾਏ !
ਸੁੱਤਾ ਘੂਕ ਮੋਤੀਏ ਰੰਗਾ
ਚਾਨਣ ਧੋਤਾ ਸ਼ਹਿਰ ਏ ਤੇਰਾ
ਜੀਕਣ ਤੇਰਾ ਹੋਵੇ ਡੋਲਾ
ਅੰਬਰ ਜੀਕਣ ਤੇਰਾ ਵੀਰਾ
ਬੰਨੇ ਬਾਹੀਂ ਚੰਨ-ਕਲੀਰਾਂ
ਤਾਰੇ ਸੋਟ ਕਰਾਏ !
ਅਜ ਦੀ ਰਾਤ ਮੁਬਾਰਿਕ ਤੈਨੂੰ
ਹੋਏ ਮੁਬਾਰਿਕ ਅਜ ਦਾ ਸਾਹਿਆ
ਅਸੀਂ ਤਾਂ ਸ਼ਹਿਰ ਤੇਰੇ ਦੀ ਜੂਹ ਵਿਚ ਮੁਰਦਾ ਦਿਲ ਇਕ ਦੱਬਣ ਆਏ !
ਸ਼ਹਿਰ ਕਿ ਜਿਸ ਦੇ ਸਿਰ ਤੋ ਪੀਲਾ
ਚੰਨ ਨਿਰਾ ਤੇਰੇ ਮੁੱਖੜੇ ਵਰਗਾ
ਸਿੰਮਲ-ਫੁੱਲ ਦੀ ਫੰਭੀ ਵਾਕਣ
ਉੱਡਦਾ ਟੁਰਿਆ ਜਾਏ !
ਜਿਸ ਨੂੰ ਪੀੜ ਨਿਆਣੀ ਮੇਰੀ
ਮਾਈ -ਬੁੱਢੀ ਵਾਕਣ ਫੜ ਫੜ
ਫੂਕਾਂ ਮਾਰ ਉਡਾਏ
ਭੱਜ ਭੱਜ ਪੋਹਲੀ ਦੇ ਖੇਤਾਂ ਵਿਚ
ਜ਼ਖਮੀ ਹੁੰਦੀ ਜਾਏ !
ਅਜ ਅਸੀਂ
ਤੇਰੇ ਸ਼ਹਿਰ ਹਾਂ ਆਏ !