ਟੱਪੇ.../ ਸੁਰਜੀਤ ਪਾਤਰ

ਟੱਪੇ.../ ਸੁਰਜੀਤ ਪਾਤਰ

ਸੀ ਉਹ ਪੁੱਤ ਤਾਂ ਅਮੀਰਾਂ ਦਾ
ਗੌਤਮ ਬੁੱਧ ਹੋ ਗਿਆ 
ਸੁਣ ਗੀਤ ਫਕੀਰਾਂ ਦਾ

ਇਹ ਹੈ ਰਾਗ -ਰਹੱਸ ਵੇ ਬੀਬਾ
ਨਾ ਤਾਂ ਤਾਰਾਂ ਰੱਖ ਢਿੱਲੀਆਂ
ਨਾ ਬਹੁਤੀਆਂ ਕੱਸ ਵੇ ਬੀਬਾ

ਤੇਰਾ ਏਹੋ ਹੀ ਸੁਰਗ ਹੋਣਾ
ਪੂਜ ਬਜ਼ੁਰਗਾਂ ਨੂੰ
ਕਦੀ ਤੂੰ ਵੀ ਬਜ਼ੁਰਗ ਹੋਣਾ

ਮੈਂ ਸਬੂਤ ਜਨਾਬ ਮੰਗਦਾਂ
ਰੱਬ ਕਿਤੇ ਹੈ ਕਿ ਨਹੀਂ
ਇਸ ਗੱਲ ਦਾ ਜਵਾਬ ਮੰਗਦਾਂ

ਕੀ ਹੋਰ ਜਵਾਬ ਦਿਆਂ
ਮਿੱਟੀ ਵਿਚੋਂ ਖਿੜਿਆ ਏ
ਲੈ ਇਹ ਸੁਰਖ ਗੁਲਾਬ ਦਿਆਂ

ਤੇਰੇ ਰੰਗ ਦਾ ਗੁਲਾਬ ਕੋਈ ਨਾ
ਤੇਰੀਆਂ ਕਿਤਾਬਾਂ ਵਿਚ ਵੇ
ਸਾਡੀ ਗੱਲ ਦਾ ਜਵਾਬ ਕੋਈ ਨਾ

ਧੁੱਪ ਰੱਖ ਦੇ ਜਾਂ ਛਾਂ ਰੱਖ ਦੇ
ਮੋਈ ਨੂੰ ਜਿਵਾਉਣ ਵਾਲਿਆ
ਵੇ ਤੂੰ ਮੇਰਾ ਕੋਈ ਨਾਂ ਰੱਖ ਦੇ

ਐਵੇਂ ਜ਼ਖਮ ਉਚੇੜੀਂ ਨਾ
ਕੁੱਖ 'ਚ ਮੈਂ ਬੁਣੀ ਕਵਿਤਾ
ਕੋਈ ਸਤਰ ਉਧੇੜੀਂ ਨਾ

ਕਦੀ ਮੇਰਾ ਵੀ ਯੁਗ ਆਉਣਾ
ਬੀਜਿਆ ਹਰ੍ਫ਼ ਹਰ੍ਫ਼
ਮੇਰੀ ਕਵਿਤਾ 'ਚ ਉੱਗ ਆਉਣਾ

Thanks for Reading this. Like us on Facebook https://www.facebook.com/shivbatalvi and Subscribe to stay in touch.