ਫੁੱਲਾਂ ਤੋਂ ਰੰਗ ਲੈ ਕੇ..ਗ਼ਜ਼ਲ...ਰਾਜ ਲਾਲੀ ਬਟਾਲਾ

ਫੁੱਲਾਂ ਤੋਂ ਰੰਗ ਲੈ ਕੇ

ਫੁੱਲਾਂ ਤੋਂ ਰੰਗ ਲੈ ਕੇ ਪਤਝੜ 'ਚ ਭਰ ਰਿਹਾ ਹਾਂ
ਮਾਲੀ ਇਹ ਸੋਚਦਾ ਹੈ ਸਾਜ਼ਿਸ਼ ਮੈਂ ਕਰ ਰਿਹਾ ਹਾਂ

ਵਗਦੀ ਰਹੇ ਨਿਰੰਤਰ, ਜਾ ਆਖਣਾ ਨਦੀ ਨੂੰ
ਹਾਲੇ ਪਿਆਸ ਨੂੰ ਮੈਂ ਹੋਠਾਂ 'ਤੇ ਧਰ ਰਿਹਾ ਹਾਂ

ਚੜ੍ਹਿਆ ਨਾ ਨਾਮ ਮੇਰਾ ਉਸਦੀ ਜ਼ੁਬਾਨ ਉੱਤੇ
ਤਰਤੀਬ ਨਾਲ ਬੇਸ਼ਕ ਲਫ਼ਜ਼ਾਂ ਨੂੰ ਧਰ ਰਿਹਾ ਹਾਂ

ਇਹ ਦੇਖ ਹੁਣ ਲਵੇਗਾ ਮੇਰੇ ਸਰੂਪ ਸਾਰੇ
ਸ਼ੀਸ਼ੇ ਦੇ ਰੂਬਰੂ ਹਾਂ, ਹੁਣ ਆਪ ਡਰ ਰਿਹਾ ਹਾਂ

ਚੜ੍ਹਿਆ ਜਦੋਂ ਦਾ ਸਾਵਣ, ਚਾਵਾਂ ਨੂੰ ਖੰਭ ਲੱਗੇ
ਮੈਂ ਆਪ ਬਣ ਕੇ ਬੇੜੀ, ਸਾਗਰ ਨੂੰ ਤਰ ਰਿਹਾ ਹਾਂ

ਆਪਣੇ ਹੀ ਘਰ ਦੇ ਅੰਦਰ ਮੈਨੂੰ ਨਕਾਰਦੇ ਹਨ
ਨੁੱਕਰ 'ਚ ਜੀ ਰਿਹਾ ਹਾਂ, ਨੁੱਕਰ 'ਚ ਮਰ ਰਿਹਾ ਹਾਂ

'ਲਾਲੀ' ਗੁਆ ਕੇ ਜੋ ਜੋ ਚਿਹਰੇ ਨੇ ਜ਼ਰਦ ਹੋਏ
ਮੈਂ ਊਰਜਾ ਉਹਨਾਂ ਦੀ ਰਗ ਰਗ ਚ ਭਰ ਰਿਹਾ ਹਾਂ

Thanks for Reading this. Like us on Facebook https://www.facebook.com/shivbatalvi and Subscribe to stay in touch.