Ghazal - Gurdeep Bhatia ji

Gurdeep Bhatia Ji

 

 

ਝੂਠ ਨੂੰ ਝੂਠ ਕਿਹਾ ਉਸ ਨੂੰ ਬੁਰਾ ਲਗਦਾ ਹੈ।
ਮੈਨੂੰ ਉਹ ਵਕਤ ਦੀ ਸਰਕਾਰ ਜਿਹਾ ਲਗਦਾ ਹੈ।

ਉੱਚੀ ਸਾਹ ਲੈਣਾ ਵੀ ਸਾਡੇ ਲਈ ਵਰਜਿਤ ਹੈ ਜਦੋਂ,
ਕੋਈ ਹਸਦਾ ਹੈ ਤਾਂ ਮਨਜ਼ੂਰ-ਸ਼ੁਦਾ ਲਗਦਾ ਹੈ।

ਉਸ ਨੂੰ ਕੰਡਾ ਵੀ ਚੁਭੇ, ਪਾਉਂਦੈ ਦੁਹਾਈ, ਜਦ ਕਿ,
ਸਾਡਾ ਮਰਨਾ ਵੀ ਉਹਨੂੰ ਨਖ਼ਰਾ ਜਿਹਾ ਲਗਦਾ ਹੈ।

ਕਿੰਨਾ ਸੌਖਾ ਹੈ ਤਵਾ ਲਾਉਣਾ ਕਿਸੇ ਦੂਜੇ ਦਾ,
ਤਦ ਪਤਾ ਲਗਦੈ, ਜਦੋਂ ਅਪਣਾ ਤਵਾ ਲਗਦਾ ਹੈ।

ਕੋਈ ਕੀ ਨਿਰਨਾ ਕਰੇ, ''ਦੀਪ'' ਖ਼ਰੇ ਖੋਟੇ ਦਾ,
ਕੰਮ ਆਉਂਦਾ ਹੋਇਆ ਖੋਟਾ ਵੀ ਖ਼ਰਾ ਲਗਦਾ ਹੈ।