ਆ ਖਿੜੀਏ ਕੰਵਲ ਵਾਂਗੂੰ .../ ਗ਼ਜ਼ਲ.../ ਸਿਮਰਨ ਮਾਨ

ਆ ਖਿੜੀਏ ਕੰਵਲ ਵਾਂਗੂੰ .../ ਗ਼ਜ਼ਲ.../ ਸਿਮਰਨ ਮਾਨ 

ਨਾ ਏਦਾਂ ਮੋਮ ਵਾਕਣ ਆਪਣੇ ਹੀ ਸੇਕ ਵਿਚ ਢਲ਼ੀਏ
ਆ ਬੱਤੀ ਵਾਂਗ ਆਪਾਂ ਸ਼ੌਕ ਦੇ ਨਾਲ ਰਾਤ ਭਰ ਬਲ਼ੀਏ

ਤਰੱਕੇ ਪਾਣੀਆਂ ਅੰਦਰ ਵੀ ਆ ਖਿੜੀਏ ਕੰਵਲ ਵਾਂਗੂੰ
ਖੜੋਤੇ ਪਾਣੀਆਂ ਵਿਚ ਉੱਲੀਆਂ ਦੇ ਵਾਂਗ ਨਾ ਪਲ਼ੀਏ

ਆ ! ਮਹਿੰਦੀ ਘੋਲ਼ੀਏ ਰੰਗਾਂ ਦੇ ਸੂਰਜ ਦੇ ਕਟੋਰੇ ਵਿਚ
ਤੇ ਕਾਲ਼ੀ ਰਾਤ ਦੇ ਪਿੰਡੇ 'ਤੇ ਤਾਰੇ ਭੋਰ ਕੇ ਮਲ਼ੀਏ

ਤਨਾਂ ਦੇ ਪਿੱਪਲਾਂ ਨੂੰ ਪਾਈਏ ਰੂਹ ਦੇ ਨਿੱਤਰੇ ਪਾਣੀ
ਦੁਆਲੇ ਨਾ ਇਹਨਾਂ ਦੇ ਇੰਝ ਕੱਚੀਆਂ ਅੱਟੀਆਂ ਵਲ਼ੀਏ

ਆ ! ਹਉਕੇ ਦੇ ਥਲਾਂ 'ਚੋਂ ਭਾਲ਼ੀਏ ਮਹਿਕਾਂ ਦੀ ਗੁੰਮ ਡਾਚੀ
ਤੇ ਖਾ ਕੇ ਠੋ੍ਹਕਰਾਂ ਵੀ ਡਾਚੀਆਂ ਦੇ ਨਾਲ਼ ਜਾ ਰਲ਼ੀਏ

ਸਮੁੰਦਰ ਤੋਂ ਵੀ ਡੂੰਘੀ ਹੋ ਗਈ ਹੈ ਤਿਸ਼ਨਗੀ ਦਿਲ ਦੀ
ਕਿਨ੍ਹਾਂ ਪੱਤਣਾਂ ਨੂੰ ਦੁਖ ਦੱਸੀਏ ਤੇ ਕਿਸ ਦਰਿਆ 'ਚ ਜਾ ਰਲ਼ੀਏ

Thanks for Reading this. Like us on Facebook https://www.facebook.com/shivbatalvi and Subscribe to stay in touch.