 |
| Dr. Hardeep Kaur Sandhu http://punjabivehda.wordpress.com |
ਵੱਡੇ ਦਿਨਾਂ ਦੀਆਂ ਜਦ ਹੋਈਆਂ ਛੁੱਟੀਆਂ
ਕੰਮ ਮੁਕਾਉਣ ਦੀਆਂ ਲਾਈਆਂ ਝੁੱਟੀਆਂ
ਕੱਲ ਜਦ ਸਕੂਲ ਦਾ ਕੰਮ ਹੈ ਨਿਬੜਿਆ
ਨਾਨਕੇ ਜਾਣ ਦਾ ਚਾਅ ਜਿਹਾ ਚੜਿਆ
ਗਈ ਨਾਨਕੀਂ ਨਿੱਕੜੀ ਚਾਈਂ-ਚਾਈਂ
ਭੱਜ ਕੇ ਚੁੱਕਿਆ ਓਸ ਨੂੰ ਮਾਮੇ ਜਾਈ
ਕੰਮ ਓਹ ਆਵਦੇ ਭੁੱਲ ਕੇ ਸਾਰੇ
ਸਦਾ ਨਿੱਕੜੀ ਦੇ ਰਹਿੰਦੀ ਦਵਾਲ਼ੇ
ਵੱਡੀ ਭੈਣ ਜੋ ਮਾਮੇ ਜਾਈ
ਤਾਜੀ ਸਿੱਖੀ ਓਸ ਨੇ ਸਿਲਾਈ
ਨਿੱਕੜੀ ਦੀ ਫਰਾਕ ਸਿਓਣ ਦੀ
ਐਤਕੀਂ ਓਸ ਨੇ ਰੌਲ਼ੀ ਪਾਈ
ਪੀਲ਼ੇ ਰੰਗ ਦਾ ਕੱਪੜਾ ਲਿਆ ਕੇ
ਫੁੱਲਾਂ ਵਾਲੀ ਬਤੱਖ ਬਣਾ ਕੇ
ਵਿੱਚ ਰੰਗ ਭਰ ਕੇ ਹਰਾ-ਗੁਲਾਬੀ
ਪੀਲ਼ੇ ਰੰਗ ਦੀ ਫਰਾਕ ਸਿਓਂਤੀ
ਨਿੱਕੜੀ ਪਾਵੇ ਚਾਈਂ-ਚਾਈਂ
ਹਾਸਾ ਫੁੱਟਿਆ ਅੱਖਾਂ ਥਾਈਂ
ਹੁਣ ਵੀ ਨਿੱਕੜੀ ਜਦ ਵਰ੍ਹਿਆਂ ਪਿਛੋਂ
ਕੱਢ ਫਰਾਕ ਯਾਦਾਂ ਦੀ ਗਠੜੀ ਵਿੱਚੋਂ
ਜਦ ਆਵਦੇ ਗੱਲ਼ ਹੈ ਪਾਉਂਦੀ
ਵੱਡੀ ਭੈਣ ਦੇ ਨਿੱਘੇ ਮੋਹ ਦੀ
ਅੱਜ ਵੀ ਓਹੀ ਮਹਿਕ ਹੈ ਆਉਂਦੀ !
ਹਰਦੀਪ
* ਇਹ ਫਰਾਕ ਮੇਰੀ ਮਾਮੇ ਜਾਈ ਵੱਡੀ ਭੈਣ ਦਵਿੰਦਰ ਨੇ ਪੇਂਟ ਕਰਕੇ ਸਿਓਂਤੀ ਸੀ ਜਦੋਂ ਮੈਂ 7-8 ਸਾਲ ਦੀ ਹੋਵਾਂਗੀ। ਅੱਜ ਯਾਦਾਂ ਦੀ ਪੋਟਲੀ ਖੋਲ ਕੇ ਓਸ ਦਾ ਸਕੈਚ ਬਣਾਇਆ !
Thanks for Reading this. Like us on Facebook and Subscribe to stay in touch.
